تذكير بمساهمة فاتح الموضوع :

 
السلام عليكم ورحمة الله وبركاته
من منا لم يتعرض لبعض المواقف المضحكة والمحرجة في حياته اليومية
قد تكون بعض هذه المواقف حدثت سابقا في أيام الدراسة أو في أيام الطفولة
المهم انك مررت بموقف مخجل أو مضحك وغالبا فحتى المواقف المحرجة مضحكة
عن نفسي مررت بالكثير من المواقف والتي سأروي لكم بعضها إن شاء الله
وبالمقابل أريد مشاركة الجميع في هذه الصفحة
فالغاية من الموضوع الترويح عن النفس
بانتظار أجمل المواقف من أحلى الأعضاء
سناء
 

damI كتب:

الصراحة انا انسان كنت عاااقل في صغري (و مازالني لضرك)  

هذي بكري فالابتدائي نشفا تالمون منت عاقل بزااف و كنت نقرا مليح نشفا مرة "سيدي" المعلم خرج من القسم و عيطلي عطالي طبشور (الله يذكرو بالخير) وقالي سجل لي يهدر ورا السبورة..

و كي رجع كنت مسجل 2 ولا 3 أسامي و عطالهم ضربة ضربة بالعصا و كي خرجنا و راجع للدار كان واحد من الأسامي لي سجلتهم جاري و ما كنتش نعرفو بيه لسع سكن فالجديد مالا مشينا بعدت على المدرسة شوية و قبضوني واحد حكمني و هذا لي جاري ضربني   

------------

هذي لحكاية حكيتها بيها ممكن كانت سبب في صداقتي مع هذا جاري لي ضربني و بعدها ولينا اكثر من أصدقاء

هههههه عماد العاقل
العاقل دايما ياخذها بطريحة بصح مليح راكم تفاهمتو من بعد ورجعتو أصدقاء ما محبة إلا بعد عداوة
بصح قولي ضربوك بزاف ولا غير شوي برك؟ جابلي ربي بزاف على خاطر مازالك متفكرها ههههههه
أسعدتني مشاركتك عماد

ماعلاباليش علاش الحاجة تاع الصغر ترسخ في الذاكرة هكذا وتغيضنا أنا مازلت لدوك نتفكر كيفاش ظلمتني المعلمة وضربتني وكانت السبب في كرهي لمادة الرياضيات وحرمتني من حلمي  لأنني  أصبحت لا أطيق هذه المادة فكان توجهي أدبي بدل العلمي كاين معلمين وأساتذة ربي يهديهم برك
كنت في السنة الخامسة إبتدائي وكنت تلميذة مجتهدة يعني دائما من الأوائل المراتب الأربعة الأولى
كانت تجلس معي تلميذة  ضعيفة  المستوى كانت المعلمة دائما تعاونها على خاطر ببساطة هاذ التلميذة إبنة معلمة أخرى في نفس المدرسة وأنا ماعلاباليش علاش كانت تكرهني مع أنني عاقلة ونقرى مليح
كانت دايما تشدني على غلطة وتضربني وخاصة كي نقولها معلمتي ريم  -هادا إسم البنت لي تجلس معايا- راهي تنقل من عندي تبدى تقولي اسكتي ولا نجيك
وحد المرة في إمتحان قالتنا كل واحد يخدم وحدو ولي ينقل نقصلو العلامة ونضربو وكان إمتحان رياضيات أنا كنت نخدم دائما وحدي وعمري ما ننقل
المهم كملنا الإمتحان وروحت للدار فرحانة خدمت مليح ثاني يوم جاء وقت توزيع النقاط والمفاجأة  العلامة تاعي 0 وتاع ريم 10  على خاطر الإجابتين كانتا نسخة طبق الأصل مع أنها هي لي نقلت من عندي حرف حرف
بكيت وقلت للمعلمة والله غير هي نقلت من عندي حكمتني وضربتني ضرب مازال لدوك يوجعني راسي شدتني من شعري وراحت تدي وتجيب فيا والله كي نتفكر طيحلي الدمعة والتلاميذ كامل يضحكو وانا غاضني الحال وأول مرة في حياتي نحس بمرارة الظلم رغم صغر سني عقدتني رحت للدار شكيت لبابا ويما
وحكيتلهم واش صرى
يما راحت للمعلمة ثاني يوم  وقالتلها علاش هكذا ضربتيها مع انها ما دارت والو ؟ المستوى ديالها تعرفيه مليح يخي دائما من الأوائل علاش هكذا حقرتيها
بابا راح شكا للمدير وووووو
المهم المعلمة إعتذرت بصح أصبحت تعاملني بطريقة لا تعجبني تتجاهلني رغم مشاركتي وكأنني غير موجودة في القسم فأصبحت بدوري قليلة المشاركة
مما انعكس على مستواي الدراسي الذي أصبح متوسط بعد أن كان جيد
وأصبحت لا أطيق مادة الرياضيات لسنوات كنت أدرس جميع المواد وأستوعبها عدا مادة الرياضيات سبحان الله (حابسة) ومازالت لليوم ههههههه
درت شوي قلبي في البكالوريا وجبت 14 ههههه ما نعرف كيفاش
هاد المعلمة خلاتني نتبع الفرع الأدبي بدل الفرع العلمي وخلاتني نتخلى على حلمي وهو دراسة الطب
ومازال السؤال يدور في ذهني علاش دارت هكذا؟
وللأسف لم أجد إجابة
سناء

بمناسبة أنني نابغة في الرياضيات كما سبق وأن قلت ونفهم بزاف في الأرقام و و و و
تفكرت موقف آخر أول مرة رحت la poste باش نجبد لابورس كانو عندي 4000 دينار كون تشوفو كيفاش كتبتها  بالأرقام هههههههههههههه
نخليكم تتوقعو خير
برك حبيت نقولكم تاع الgيشي قعد ساعة وهو يخزر فيا وقال لا حول ولا قوة إلا بالله ههههههههه
تبهدايل تاع سناء

dzgangsta كتب:

السلام عليكم 
أولا مشكورة أخت سناء على هذا الموضوع و الله فكرة أكثر من رائعة 
أول موقف سوف أسرده لم يحدث لي و لكن كنت شاهدا على أحداثه 
في أحد المرات و أنا متوجه إلى البيت و في ساعة متأخرة تصادفت مع أحد الأصدقاء 
و نحن في الطريق مر من أمامنا قط صغير و بسرعة فائقة جدا و كأنه فار من شيء بعدها بثوان فقط
و إذا بكلب يخرج مسرعا و من شدة الخوف وقف صديقي بجوار الحائط و قال للكلب : القط راه راح منا
و انفجرت أنا ضاحكا ..... راحت عليك يا صاحبي 
تقبلوا مروري 

 

 

وعليكم السلام ورحمة الله وبركاته
العفو أخي الحمد لله أن الموضوع أعجبكم وما قلقتكمش برسائلي الخاصة إذا قلقتكم قولولي نزيد نبعث ههههههه
بالنسبة للموقف والله ضحكت من قلبي حتى طاحولي الدموع
أضحك الله سنك dzgangasta
ولا تحرمنا من مثل هذه المواقف
في انتظار مواقف الأعضاء الآخرين
والله كاين أعضاء أخرين راني حابة نبعثلهم باش يشاركو معانا بصح ماعلاباليش علاش خفت
علابالي كثرت بزاف ومانيش حابة يصرالي موقف محرج هنا ههههههه 

راني نتخيل فيك وانت راجع فرحان زعما ههههههههه أنجزت المهمة بنجاح

موقف آخر مخجل وفيه  النية إن صح القول
كنت في الجامعة رفقة مجموعة من الزميلات نتحدث في موضوع وكنت مندمجة تماما ومركزة في النقاش
فجأة تقدم مني أحد الشباب قائلا: أختي معليش الثيليفون ديالك
فتحت حقيبتي وناولته الهاتف  ورحت أكمل نقاشي.. إعتقدت أنه في حاجة لوحدات (لي زونيثي)
فتسمر مكانه ونظر إلى وعلامات الدهشة والإستغراب بادية على وجهه  
فحركت رأسي  دون ان أتكلم كنوع من التساؤل ما بك؟
لم ينطق بكلمة واحدة وغادر المكان  
فضحكت زميلاتي ضحكا شديدا
عرفت بعدها أنه كان يقصد رقم هاتفي (كنوع من التعارف)
مرات النية تسلكنا من مواقف نحن في غنى عنها