تكون جايز في الطريق مثلا و عندكم عرس في الدار و العشاء في المساء ، فتجد رجل تعرفو و ماتحملوش تقولو صح خويا راك مليح ؟ و تضحك معه لكن في الحقيقة هبطلك المورال كي شفتو فيقول لك لاباس ، و انت تحاول التهرب منه باش ما تعرضوش لكنه يلح على ذلك و يقولك واش كاش عراس ؟ فتقول له ميتة ماكاش الزواج رجع واعر حبيبي و تحاول تدوير الصفحة ، لكنه يعود الى موضوع الأعراس و يقولك ريحة اللحم راي دايرة حالة جيهة داركم فتقول له إيه أسكت برك جارنا ختن وليدو دبح فيها كبش ، و تحاول التهرب لكنه يقول لك : راكم دايرين الباش في داركم غير الخير ، تفكر قليلا لتجد حلا لكن ما تصيبش واش تقول =السخانة بزاف مثلا ؟؟ ماتجيش فتكون مضطرا باش تعرضو ، تقولو و انت تضحك فوق القلب ايه نسيت كامل لعشية جوز تتعشا فيأتي في المساء و معه جيش من الاطفال ولادو ولاد اختو مثلا ولاد خوه و يزيد يلقط شوية اطفال من الحومة و يجيبهم معاه فتجد أمامك فريق وطني من الاطفال و تجوزهم يتعشاو و المشكل طبعا =يدومونديو باطة حلوى في النهاية= و عند الانسحاب يجمعهم الشخص لي عرضتو ينحيلهم قاع الحلويات و يخليلهم باطة فقط يقوللهم اقسموها و الباقي يديه يسقهوى بيه لمدة شهر.