ما عشت لا انسى سنوات طفولتي الاولى وتلك الليالي الصيفية اين كنا ننصب "السدة" (لا اعتقد ان الكثير يعرفها) و ننتظر بفارغ الصبر متى يحل الظلام حتى تحكي لنا امي قصصا سمعتها منذ طفولتها.. قصصا كانت لنا خير من قصص شهرزاد, تذكرت احداها فاردت مشاركتكم اياها وارجو ان تعجبكم:
حااااااجيتكم و كان هوما ما جيتكم... كان واحد "المسيسي" و "الجربوع" كانو يمشو لقاو زوج صراير (جمع صرة) كل واحد هز وحدة.. "المسيسي" ذاق منها لقاها غرس و "الجربوع" ذاق لقاها ملح, مالا "المسيسي" قالو واش رايك لوكان نعرضوا خالاتي و خالاتك و عماتي و عماتي و جداتي و جداتك على هذا الغرس؟؟ "الجربوع" عجباتو الفكرة قالو ايه معليهش؟ راح "المسيسي" يعرض في العائلة وبقا "الجربوع" في الدار, غلباتو كرشو راح كلا هذاك الغرس كي جا "المسيسي" قالو وين راه الغرس؟ قالو ما شفتوش.. مالا فاق بيه بلي كلاه, راح قطعلو ذيلو.. بدا "الجربوع" يبكي و يقلو رجعلي ذيلي راني ما نزيدش نعاود.. مالا قالو "المسيسي" روح جيبلي العنب من عند الدالية, راح للدالية قالها اعطيني العنب و العنب للمسيسي و المسيسي يرجعلي ذيلي و نرجع لبيتنا بخير. قالتلو جيبلي الماء من الساقية. راح للساقية قالها مديلي الماء والماء للدالية و الدالية تمدلي العنب والعنب للمسيسي و المسيسي يرجعلي ذيلي و نرجع لبيتنا بخير, قالتلو روح جيبلي العود (الحصان) يشرب مني, راح للحصان قالو ارواح اشرب من الساقية باش تمدلي الماء للدالية باش تمدلي العنب و نديه للمسيسي باش يرجعلي ذيلي و نروح لبيتنا بخير, قالو جيبلي الشعير ناكل, راح للفلاح قالو مدلي الشعير والشعير للحصان باش يروح يشرب من الساقية باش تمدلي الماء للدالية باش تمدلي العنب للمسيسي باش يرجعلي ذيلي و نروح لبيتنا بخير, قالو الفلاح روح للحداد جيبلي المنجل باش نقطع بيه الشعير,راح للحداد وقالو مدلي المنجل .............. (تعبت وانا نعاود فيها راكم عارفين السلسلة) قالو الحداد جيبلي الحطب من الغابة باش نشعل النار و نخدم المنجل, راح للغابة وقالها................. قالتلو جيبلي الاسد يزأر عليا, راح للاسد قالو ارواح ازأر على الغابة باش..................... قالو الاسد جيبلي الحمار (اكرمكم الله) من عند العجوز باش ناكلو و نزأر على الغابة, راح للعجوز قالها مديلي................... قالتلو ما نمدولكش الا اذا جبتلي الماء في الغربال (زعما باش تعجزو) راح الجربوع كلما يهز الماء بالغربال يسيل حتان جا فايت عليه الغراب يصيح قالو (دير الحما يعطيك العما -يقصد دير الطين في الغربال باش يشدلك الماء و ما يسيلش-) راح دار الطين و ملا الغربال و اداه للعجوز و العجوز مدتلو الحمار و اداه للسبع كي كلاه راح زأر على الغابة و الغابة مدتلو الحطب و الحطب للحداد و الحداد خدملو منجل و المنجل للفلاح و الفلاح مدلو الشعير و الشعير للحصان و الحصان كلا الشعير و راح شرب من الساقية و الساقية مدتلو الماء و الماء للدالية و الدالية مدتلو العنب و العنب للمسيسي و المسيسي رجعلو ذيلو و رجع لبيتهم بخيييييييييييييييييييييييير
اليكم التعليق..

شكرا لك اختي والله أجمل شيء في هذه الحياة هو الاستماع الى قصص طفولة امك التي كانت تحكيها لها امها اي جدتكي
 شكرا لك اختي على الموضوع

راااااااااااااااااائعة كروعتكي يا نور،ولا تتصورين كم استمتعت بقرائتها،ما اروع الماضي بالفعل و كيف ان أمهاتنا يحاجونا و يحكولنا قبل ما نرقدو...يعطيك الصحة

شكرا ملاك شكرا سعدية على مروركما الطيب اسعدني رداكما